طريقة عمل الهريسة النبكية على أصولها بخطوات سهلة

الهريسة النبكية على أصولها – الطعمة والريحة ولا أطيب

تكفي: تقريبًا 10 أشخاص

مدة التحضير: نص ساعة + وقت راحة العجينة

المكونات

• 4 كاسات سميد حلويات خشن
• ملعقتين كبار سمن حيواني
• كاستين لبن أو زبادي
• كاستين سكر
• ملعقة ونص كبيرة بيكن باودر
• ملعقة صغيرة كربونات
• مكسرات للتزيين (لوز أو فستق أو جوز)
• قطر (شيرة) بارد جاهز

طريقة التحضير

1. منحط السميد الخشن بوعاء كبير ومنضيف فوقه السمنة.
2. منبلش نفرك السميد والسمنة بإيدينا منيح لحتى يصير متل الرمل. (ممكن تلبسو قفازات لحتى تكون العملية أنظف وأسهل).
3. منضيف السكر ومنخلطن سوا لحتى يختلطو.
4. منضيف اللبن والبيكن باودر والكربونات ومنمزج بلطف لحتى تتجانس المكونات وتصير عجينة.
5. منغطي العجينة بكيس نايلون ومنتركها ترتاح:
   • يا أربع ساعات،
   • يا لتاني نهار إذا حابين تجهزوها قبل بوقت.
7. بعد الراحة، مندهِن الصينية بالسمنة ومنفرد فيها الخليط بالتساوي.
8. مندهِن وجهها كمان شوية سمنة.
9. مننقع المكسرات شوي بالمَي، منصفيها ومنوزعها عالوجه للتزيين.
10. مندخل الصينية عالفرن بحرارة وسط، ولما يصير لونها دهبي من فوق ومن تحت، منغرز عود خشب أو سكينة بالوسط: إذا طلع ناشف بتكون استوت.
11. بعد ما نطلعها من الفرن، منقطعها فورًا بالشكل اللي منحبّه (مربعات أو معينات).
12. منتركها تبرد شوي، وبعدين منسكب عليها القطر البارد بالتدريج حسب الرغبة.

نصايح صغيرة

• القطر لازم يكون بارد والهريسة سخنة ليمتصها السميد منيح.
• إذا بتحبّوها حلوة زيادة زيدوا القطر شوي، وإذا بتحبّوها وسط خفّفوا القطر.
• بتطلع بتجنن مع فنجان قهوة أو شاي بعد الغدا